Á söguslóðum í Dalasýslu

Á söguslóðum í Dalasýslu
Undir dalanna sól
Að fara út af hringveginum opnar mönnum nýja og stórkostlega sýn á landið.  Ef ekið er upp Bröttubrekku og haldið inn í Dalabyggð lýkst upp sérstætt og fallegt landslag á söguslóðum Íslendingasagna. Sléttan neðan Bröttubrekku er einnig sögustaður margra atburða á Sturlungaöld. Dalirnir hafa allt að bjóða og þjónusta við ferðafólk er þar afbragðsgóð. Meðan ekið er að Eiríksstöðum inn hinn fallega dal Haukadal má sjá veiðimenn kíkja eftir laxi á bökkum Haukadalsár. Bær Eiríks rauða hefur verið endurbyggður og á þessu skemmtilega safni lifnar sagan við. Fyrirmyndin af húsinu, eða grunnflötur hússins, eru tóttir sem grafnar voru upp og aldursgreindar og reynast vera með elsta sniði sem fundist hefur hér á landi.

Menningarsetur í Búðardal
Þema landafundanna má síðan kanna frekar og sökkva sér ofan í þessa merku atburði yfir kaffibolla í Leifsbúð, menningar- og safnahúsinu í Búðardal. Húsið stendur niður við höfnina og Vínlands- og landafundasýningin, sem tileinkuð er Leifi heppna, er einstaklega falleg og vel samansett sýning. Eftir að hafa dvalið í fortíðinni um stund er sjálfsagt að skoða sig um og njóta þeirra sýninga sem í boði eru á hverjum tíma. Í Búðardal má dvelja dagpart eða koma sér upp bækistöð á þægilegu tjaldstæði þorpsins og ferðast þaðan til áhugaverðra staða í næsta nágrenni. Enginn ætti að láta hjá líða að heimsækja Lauga í Sælingsdal og fara í Guðrúnarlaug.. Í heitri notalegri lauginni má velta fyrir sér örlögum aðalsöguhetja Laxdælu, þeirra Bolla, Kjartans og Guðrúnar. Þeir fóstbræður sóttu sér heilsubót í heitum laugunum hér og fyrstu neistar ástar, afbrýði og haturs kviknuðu meðan horfðust þau í augu Kjartan og Guðrún.

Álfarnir í Tungustapa

Á Laugum er gott tjaldsstæði og ferðaþjónusta og áhugasamt göngufólk getur dvalið þar um tíma og gengið um og á milli giljanna fyrir ofan bæinn eða á Tungustapa. Göngugörpum er þó hollast að forðast að styggja álfaprestinn því hefnd álfa er hörð. Ótal fleiri áhugaverðar gönguleiðir eru í Dalabyggð en nefna má að af Klofningsfjalli er víðsýnt um Dali og yfir Breiðafjörð. Stutt er út í eyjarnar sem taldar eru vera eitt af þremur fyrirbærum hér á landi sem eru óteljandi. Góð aðstaða er einnig fyrir hestamenn í Dölum, margvíslegar reiðleiðir í boði og ferðamáti forfeðranna á hér sérlega vel við. Íslenska haförninn má oft sjá á Fellsströnd og Skarðsströnd, enda sækja fuglaáhugamenn mikið á þessar slóðir.

Stjórnsýsluhús Dalabyggðar
 Miðbraut 11 • 370 Búðardal
+354 430 4700
dalir@dalir.is
www.dalabyggd.is


Tengt efni

Eldri tölublöð
Öll blöð í vefútgáfu

Netútgáfa. Samhliða prentaða blaðinu verður einnig hægt að nálgast netútgáfu af blaðinu á slóðinni www.landogsaga.is. Greinarnar verða bæði í pdf og HTML formi sem gerir þér til dæmis kleift að senda þær áfram og nýta í markaðsskyni. Netútgáfan verður ítarlegri og verður hægt að senda inn efni sem sett verður á vefinn, umfram það efni sem er í blöðunum. Þessi vefur mun síðan halda áfram að vaxa og dafna. 

© 2007 - 2012 Land og saga