Gott fólk í góðu húsi
Verslunarmiðstöðin Glæsibær var opnuð í desember 1970 og var stærsta verslunarmiðstöð á Íslandi þar til Kringlan opnaði árið 1987. Alls eru 28 fyrirtæki starfandi í verslunarmiðstöðinni Glæsibæ. Eigendur hússins eru 18 talsins en sumir hverjir eiga fleiri en eina rekstrareiningu þar.

Glæsibær er mjög skemmtileg eining,“ segir Ævar Karlsson framkvæmdastjóri. „Þetta eru hæfilega stórar verslunareiningar sem hafa haldist vel í leigu og komist vel af í gegnum árin. Starfsemin hefur gengið vel og húsið er í fínum rekstri.“ Ævar hefur verið framkvæmdastjóri í Glæsibæ frá 2009. Fyrir tæpum tveimur árum stofnaði hann fasteignaumsjónardeild með Sólar ehf sem hefur síðan selt Glæsibæ þá þjónustu sem hann starfaði við áður –  en Sólar ehf er jafnframt að þjónusta önnur húsnæði.

Langlífar verslanir
Glæsibær varð 40 ára í desember 2010. Þetta var stærsta verslunarmiðstöð á Íslandi þangað til Kringlan opnaði 1987. En á þeim árum sem síðan eru liðin hafa einnig orðið miklar breytingar á Glæsibæ. Vesturturninn bættist við árið 2006 og bílastæðahúsið 2008. Turninn er núna fullnýttur og mjög lítið um laust pláss í verslunarhúsinu. Það losnaði nýlega pláss á 2. hæðinni þar sem læknamiðstöðin var eitt sinn til húsa og glersalurinn í vestur enda hússins verður laus frá áramótum, ásamt gamla danssalnum á jarðhæðinni. Verslunarrýmin hafa verið nánast fullskipuð frá upphafi og enn eru þar fyrirtæki sem hafa verið þar nánast frá byrjun, til dæmis úra- og skartgripaverslunin Heide, Snyrtivöruverslunin og Sportbarinn. Ævar segir fjölmörg önnur fyrirtæki hafa verið í húsinu í áraraðir, til dæmis Útilíf sem hefur verið þar hátt í 30 ár og sé þeirra langbesta verslun fyrr og síðar.“ En hvernig byrjaði þetta allt?
„Silli og Valdi voru driffjöðrin á bak við byggingu Glæsibæjar. Fyrsta verslunin sem opnaði í húsinu var Nýlendu- og matvöruverslun Silla og Valda. Á þeim tíma var sú verslun stærsta kjörbúð á Norðurlöndum.  Þeir voru líka með glæsilega snyrtivöruverslun og sögðu blákalt að „vart mun sú vörutegund finnast í heimi hér þar sem lögð er jafn mikil rækt við að þóknast viðskiptavininum.“ Hér var líka Hans Petersen, sem auglýsti tilboð á filmum með flasskubbum, Andersen & Lauth fataverslun, Húsgagnaverslunin Dúna, Heilsuræktin og Læknastöðin sem flutti af Klapparstígnum hingað inneftir og var á 2. hæðinni til 2008  þegar hún flutti í Turninn. Svo var hér blómaverslunin Rósin og í húsinu hefur alltaf verið starfrækt blómabúð. Hér var líka skóverslunin Skóhornið, Bókabúð Glæsibæjar og Útvegsbankinn og í kjallaranum veitingastaðurinn Útgarður og hársnyrtistofan Salon Veh.“

Samsetning fyrirtækja svipuð

„Það voru gerðar töluverðar breytingar á húsinu og þeim lauk 2002. Þá var þriðja hæðin byggð ofan á húsið sem og viðbyggingarnar framan við það og glerhýsinu í miðjunni bætt við og eins vestan megin. Þá var opnaður nýr inngangur inn í 10/11 sem snýr að Álfheimum og einnig opnað út úr því rými sem er Saffran í dag.
Þótt fyrirtæki hafi komið og farið, er samsetning fyrirtækjanna mjög svipuð. Þetta hefur alltaf verið dálítil kvennamiðstöð. Hér hafa ekki verið herraverslanir fyrr en núna með versluninni Tactical sem selur skotveiðivörur og leikföng. Samsetningin á verslunum er mjög fjölbreytt í dag. Hér eru fataverslanir, barnafataverslun, barnafylgihlutaverslun, blómabúð og skrautmunir, skatgripir og úr, hárgreiðslustofa, apótek, gjafavara, sportverslun, útivistarverslun, tískuvöruverslun, bakarí og verslun með fæðubótarefni. Stærsta breytingin má kannski segja að sé sú að í húsinu er matarmenningin alltaf að aukast. Ölver er auðvitað enn á sínum stað með bæði bar og grill. Síðan eru það Saffran og sushi-staðurinn Tokyo, tveir gríðarlega vinsælir staðir. Það er alltaf troðið út úr dyrum þar. Enda bjóða báðir staðirnir upp á heilsusamlegan mat sem passar vel við Glæsibæ. Þessi verslunarmiðstöð hefur alltaf verið mjög heilsutengd og hér má finna bæði hefðbundnar og óhefðbundar lækningar. Starfsemi bakarísins hefur einnig breyst mikið. Auk þess að vera almennt bakarí, er boðið upp á létta rétti, eins og smurt brauð og súpur.“

Hentugar einingar

Ástæðuna fyrir því hversu vel verslunar- og fyrirtækjarekstur hefur gengið í Glæsibæ segir Ævar að í húsinu séu hentugar einingar. „Það er erfitt í dag að leigja stór bil; minni aðilar ráða við að vera sjálfir
með rekstur í minni einingum. Þetta er snyrtilegt og huggulegt hús og er með bæði útibílastæði sem og bílastæðahúsið. Hér er notaleg stemning, þetta er heimilisleg verslunarmiðstöð, enginn glymjandi og lýsingin er þægileg.  Hér er mjög gott andrúmsloft og samstarf á milli þeirra einstaklinga sem eru með rekstur í húsinu er gott. Það skilar sér alltaf. Í rauninni  er Glæsibær í miðborg Reykjavíkur í dag og á bara bjarta framtíð fyrir sér. Þetta er hús í góðum rekstri, með gott fólk í stjórn. Það er gott að vinna með þessu fólki í alla staði og andrúmsloftið jákvætt.

www.glaesibaer.is

Myndbönd

Tengt efni

Eldri tölublöð
Öll blöð í vefútgáfu

Netútgáfa. Samhliða prentaða blaðinu verður einnig hægt að nálgast netútgáfu af blaðinu á slóðinni www.landogsaga.is. Greinarnar verða bæði í pdf og HTML formi sem gerir þér til dæmis kleift að senda þær áfram og nýta í markaðsskyni. Netútgáfan verður ítarlegri og verður hægt að senda inn efni sem sett verður á vefinn, umfram það efni sem er í blöðunum. Þessi vefur mun síðan halda áfram að vaxa og dafna. 

© 2007 - 2012 Land og saga