Sögustaðir - Í fótspor W.G. Collingwoods

Einar Falur Ingólfsson

Inngang ritar Margrét Hallgrímsdóttir þjóðminjavörður.
Sjá video hér

Sumarið 1897 ferðaðist breski fjölfræðingurinn W.G. Collingwood um Ísland. Tilgangur hans var að teikna og mála myndir af sögustöðum Íslendingasagna svo hægt væri að sýna unnendum þeirra á Bretlandseyjum hvernig Ísland leit út á söguöld. Alls gerði Collingwood 300 myndir sem eru ómetanleg heimild um hvernig umhorfs var á Íslandi á nítjándu öld og eru löngu orðnar sígildar.

Í þrjú sumur, frá 2007 til 2009, fetaði Einar Falur Ingólfsson ljósmyndari í fótspor Collingwoods og ljósmyndaði sömu staði frá sömu sjónarhornum og Collingwood teiknaði þá rúmri öld áður. Staðirnir sem eitt sinn voru valdir vegna þess að þar höfðu hetjur fornaldar stigið niður fæti ljóma fæstir lengur af fornaldarfrægð, en fjöll, ásar, ár og vötn eru enn þau sömu. Sögustaðir er glæsileg ferðabók um Ísland samtímans þar sem varpað er ljósi á sagnaarf okkar og margbrotna menningarsögu.

William Gershom Collingwood (1854–1932) var fagurfræðingur, rithöfundur og náinn samverkamaður Johns Ruskin, eins áhrifamesta menntamanns Bretlandseyja á síðari hluta 19. aldar, og höfundur kunnrar ævisögu Ruskins. Líkt og Ruskin og William Morris var Collingwood í senn eldheitur aðdáandi Íslendingasagna og hafði sterka sýn á eðli náttúrufegurðar. Árið 1897 ferðaðist hann um Ísland í 10 vikur í því skyni að mála vatnslitamyndir af helstu sögustöðum Íslendingasagna seinna birtust einfaldaðar í bókinni A Pilgrimage to the Saga-Steads of Iceland sem kom út árið 1899, en tók einnig ljósmyndir.

Einar Falur Ingólfsson (f. 1966) er með BA-gráðu í bókmenntafræði frá Háskóla Íslands og MFA-gráðu í ljósmyndun frá School of Visual Arts í New York. Hann hefur haldið sýningar á verkum sínum í söfnum og sýningasölum heima og erlendis. Einar Falur hefur einnig sett saman sýningar á íslenskri ljósmyndun fyrir söfn á Íslandi og á meginlandi Evrópu.

144 bls. 257 x 300 mm.
95 ljósmyndir. 45 málverk og teikningar
Sýning á myndunum stendur yfir í Bogasal Þjóðminjasafns Íslands frá 13. maí til 31. desember 2010.

Sjá video hér um bókina


Tengt efni

Eldri tölublöð
Efnisyfirlit
Öll blöð í vefútgáfu

Netútgáfa. Samhliða prentaða blaðinu verður einnig hægt að nálgast netútgáfu af blaðinu á slóðinni www.landogsaga.is. Greinarnar verða bæði í pdf og HTML formi sem gerir þér til dæmis kleift að senda þær áfram og nýta í markaðsskyni. Netútgáfan verður ítarlegri og verður hægt að senda inn efni sem sett verður á vefinn, umfram það efni sem er í blöðunum. Þessi vefur mun síðan halda áfram að vaxa og dafna. 

© 2007 - 2012 Land og saga