Epal: Góð hönnun er góð fjárfesting

„Húsgagnaframleiðendur keppast nú við að dusta rykið af gamalli klassískri hönnun um leið og þeir senda á markað ný verk hönnuða sem stöðugt eru að koma fram á sjónarsviðið,“segir Eyjólfur Pálsson, eigandi húsgagnaverslunarinnar EPAL.

Eyjólfur hefur, allt frá því EPAL tók til starfa fyrir 32 árum, lagt sig í líma við að kynna góða hönnun, hvort heldur sem er innlenda eða erlenda. Í EPAL hefur frá upphafi mátt sjá það nýjasta á sviði húsgagnahönnunar en ekki síður klassíska hönnun fyrri tíma. Margir koma í verslunina rétt eins og þeir sækja söfn til að fylgjast með, njóta og dást að fallegum og vönduðum hlutum.

Eyjólfur Pálsson, eigandi EPAL, sýnir hér nýjan stól, Copy and paste eftir Sigurð Gústafsson. Framleidd voru 99 númeruð eintök og er þessi stóll númer 75. Eyjólfur valdi númerið þar eð EPAL var stofnað árið 1975.

  Á þreföldu verði

„Góð hönnun stenst svo sannarlega tímans tönn og það er mikilvægt að menn geri sér grein fyrir gildi klassískrar hönnunar, hvað fólk er með í höndunum,“ segir Eyjólfur. Sem dæmi nefnir hann að á uppboði hjá Bruun Rasmussen í Kaupmannahöfn í fyrra hafi margra ára gamalt borðstofuborð eftir Poul Kjærholm, sem kostar 100 þúsund danskar krónur nýtt í dag, farið á 300 þúsund danskar krónur eða um þrjár milljónir íslenskra króna. Þar með hafði borðið selst á þreföldu nývirði en það stafar af því að margir áhugamenn um hönnun vilja frekar eiga notaða klassíska hluti heldur en splunkunýja þótt þeir séu sams konar, aðeins úr nýrri framleiðslu. Fallega hannaður hlutur vekur ekki aðeins ánægju heldur er hann líka góð fjárfesting. Hins vegar má ekki gleyma því að það eru ekki allir hlutir hannaðir af jafnþekktum hönnuðum og hlutir minna þekktra hönnuða geta að sjálfsögðu verið góðir og átt eftir að halda velli ef hönnunin er góð.


Eftirvænting ríkir vegna stækkunar

Undanfarin tíu ár hefur EPAL verið í Skeifunni 6 og þar verður opnuð ný hæð 1. nóvember nk. Sjö metra breiðar svalir verða yfir versluninni og í miðjunni verður tíu metra lofthæð með 70 fermetra ofanljósi. Mikil eftirvænting ríkir hjá starfsmönnum og eigendum vegna breytinganna og helmings stækkunar verslunarinnar. Fullyrða má að viðskiptavinir muni horfa til hennar með álíka eftirvæntingu. Eyjólfur segist finna aukinn áhuga á íslenskri hönnun bæði hjá almenningi og  opinberum aðilum. Það komi m.a.  fram í því að íslensk húsgögnhafi verið valin í sendiráð og sendiherrabústaði Íslands t.d.

Berlín, Indlandi og Færeyjum. „Arkitektar og ráðamenn eru farnir að líta meira til íslenskrar hönnunar þótt ekki sé hægt að nota hana eingöngu þar sem við eigum því miður ekki nógu mikið af henni enn,“ segir Eyjólfur að lokum.

Þennan fallega stól hannaði Arne Jacobsen fyrir Seðlabanka Danmerkur árið 1970. Fritz Hansen framleiðir nú stólinn á ný eftir 30 ára hlé.






Grand Prix: Þetta er eitt af meistarastykkjum danska hönnuðarins Arne Jacobsens. Maurinn þekkja flestir og allir þekkja Sjöuna en Grand Prix hlaut samnefnd verðlaun á XI þríæringnum
í Mílanó og dregur nafnið þar af. Framleiðslu stólsins var hætti árið 1995 en ákveðið var að framleiða hann frá nóvember í fyrra og fram til febrúarloka í ár. Vel getur verið að framleiðsla Grand Prix verði haldið áfram síðar.

FlowerPot hannaði danski hönnuðurinn Verner Panton árið 1969. Ljósin draga nafn sitt af blómatímabilinu sem þá stóð sem hæst.


Componibili eru hirslur sem
hönnuðurinn Anna Castelli Ferrieri á heiðurinn af. Ítalska fyrirtækið Kartell hefur framleitt þær í yfir þrjátíu ár en þær voru hannaðar 1969 og er m.a. að finna í Museum of Modern Art í New York.



Montana: Þessar hillur hafa verið í framleiðslu frá árinu 1982.


Höfðingjastólinn hannaði Finn Juhl árið 1949. Þetta er einn af þekktari stólum danskrar hönnunarsögu.

Norðmaðurinn Tias Eckhoff hannaði Maya-hnífapörin árið 1962. Þau hafa notið mikilla vinsælda alla tíð síðan og hlotið fjölda viðurkenninga. Hnífapörin má finna m.a. í  Museum of Modern Art í New York og The Victoria and Albert Museum í London. Stelton framleiðir nú þessi klassísku hnífapör.


VP Globe er einstakt loftljós sem Verner Panton hannaði árið 1977. 


Wingchair Þótt þessi stóll hafi verið hannaður fyrir hátt í 50 árum, árið 1960, er ekkert  lát á viðurkenningunum sem hönnun Hans J. Wegner hlýtur. Ákveðið var að dusta  rykið af teikningum stólsins og fara aftur að framleiða hann enda er hann talinn með bestu verkum Wegners.



Hitakannan góða Hver þekkir ekki kaffikönnuna frá Stelton sem Erik Magnussen hannaði árið 1977. Kannan er til í tveimur stærðum, hálfs og eins lítra, og ekki aðeins úr stáli heldur líka úr plasti í ótal litum.


Tengt efni

Eldri tölublöð
Öll blöð í vefútgáfu

Netútgáfa. Samhliða prentaða blaðinu verður einnig hægt að nálgast netútgáfu af blaðinu á slóðinni www.landogsaga.is. Greinarnar verða bæði í pdf og HTML formi sem gerir þér til dæmis kleift að senda þær áfram og nýta í markaðsskyni. Netútgáfan verður ítarlegri og verður hægt að senda inn efni sem sett verður á vefinn, umfram það efni sem er í blöðunum. Þessi vefur mun síðan halda áfram að vaxa og dafna. 

© 2007 - 2012 Land og saga