Veiðist langt fram eftir hausti
Veiðiár ehf. er fyrirtæki sem er með Staðarhólsá og Hvolsá í Saurbæ í Dalasýslu á leigu. Leigutakinn, Kristjón Sigurðsson segir árnar aðallega bleikjuár en þarna sé líka lax, þótt lítið hafi verið af honum fram á seinustu ár. „Hins vegar höfum við verið að auka laxinn seinustu tvö árin. Það komu um 700 fiskar upp úr ánum í fyrra, þar af voru um hundrað og fjörutíu laxar og nálægt hundrað og áttatíu árið áður.“

„Þetta er þriðja árið sem við leigjum árnar,“ segir Kristjón.

„Ástæðan er sú að ég er einn af eigendum að vatnsréttindum og var í stjórn veiðifélagsins sem á árnar. Síðan kom upp sú staða að ákveðið var að bjóða þær út og ég bauð í þær.“ 

Þegar Kristjón er spurður hvort veiðileyfi í ánnum sé dýrt, segir hann: „Það held ég nú ekki. Þetta er ekki bara fyrir Svisslendinga eða milljónera. Við erum að selja stöngina á allt að 26 þúsund fyrir daginn. Það eru fjórar stangir leyfðar í árnar – sem eru eitt vatnasvið – samanlagt 123 ferkílómetrar. Við getum ekki ráðið þarna veðri, vatni og veiði, en höfum lagt áherslu á að auka þægindi þeirra sem koma á svæðið. Við höfum lagað veiðihúsið mikið og bætt til að auðveldara sé að ganga um það og fólki líði þar betur. Við fyrirhugum að gera enn meira, til að gera staðinn áhugaverðari fyrir fjölskyldur og einstaklinga.“ Í húsinu eru fjögur tveggja manna herbergi og tvö eins manns herbergi. Þar er líka mjög góð borðstofa og nýtt eldhús sem er vel búið tækjum.

Kristjón segir ekki uppselt í árnar í sumar. „við eigum einhverja daga í byrjun júlí og einhverja í enda september, sem er ekki slæmt, því þetta eru síðsumarsár og oft góð veiði á þessum tíma.“
 
Veiðihúsið er tæplega þrjátíu kílómetra frá Búðardal, vestan við Svínadal. Áin sem rennur til vesturs í Svínadal rennur í Hvolsá og þar veiðist bæði bleikja og lax. „Þetta er þokkalega góður matfiskur,“ segir Kristjón. „Bleikjan þarna er mjög skemmtileg og veiðist líka langt fram eftir hausti.“

Til að fá veiðileyfi í Staðarhólsá og Hvolsá er auðveldast að hafa samband í gegnum netfangið, ks@rafal.is eða í gsm síma sem er 892-9034.

Tengt efni

Eldri tölublöð
Öll blöð í vefútgáfu

Netútgáfa. Samhliða prentaða blaðinu verður einnig hægt að nálgast netútgáfu af blaðinu á slóðinni www.landogsaga.is. Greinarnar verða bæði í pdf og HTML formi sem gerir þér til dæmis kleift að senda þær áfram og nýta í markaðsskyni. Netútgáfan verður ítarlegri og verður hægt að senda inn efni sem sett verður á vefinn, umfram það efni sem er í blöðunum. Þessi vefur mun síðan halda áfram að vaxa og dafna. 

© 2007 - 2012 Land og saga